Jedes Mol wenn i wider vo eu wäg mues go, blibt en Tail vo mir dött. Usegrisse, nu no s Loch isch do und Näbel vor de Auge.
Und irgendwenn goht s denn glich wider wiiter.
Wider i mim Trott, wider Liebi am Bildschirm, wider mini Sproch, wider Zitveschiebig, wider lärnä s’älai ässe gnüsse und wider mi sälber wärme.
Und irgendwenn isch denn din Platz im Bett wider bsetzt. Irgendwenn bisch denn du do. Irgendwenn hät s denn wider Wildriis ufem Tisch. Irgendwenn bisch denn du do. Irgendwenn hät s denn wider zwai Paar Finke im Gang. Irgendwenn bisch denn du do. Und wider wäg.
Jedes Mol wenn du wider vo mer wäg muesch go, ninnsch än Tail vo mer mit. Usegrisse, nu no s Loch isch do und Näbel vor de Auge.
Und irgendwenn goht s denn glich wider wiiter.
Wider i mim Trott…
Und irgendwenn hät s denn wider Kafigruch i dä Chuchi. Irgendwenn bin i bi der. Irgendwenn hangt denn wider s White-Board im Büro. Irgendwenn bin i bi der.
Und wider wäg.
Text & Melodie: Margrit Egger
Arrangements: Cali Flores
Stimme & Schwyzerörgeli: Margrit Egger
Piano: Steffi Rutz
Gitarre: Sergio Valdeos
e-Bass: Omar Rojas
Perkussion: Cali Flores
