De Nils rummt de Zmorge uf, git de Nadja en Kuss, got usem Huus wie jede Tag und waiss ganz plötzlich, was jetzt mues passiere.
Dä Sven hebt sich d Ore zue und d Auge au und druckt uf Brems und waiss glich gnau: Jetz isch s passiert!
S quiitscht und git än Ziitluperuck und denn lang nüt und denn äs Grücht: Häsch ghört? S’isch jetz gad passiert!
Und i sto zmitzt imnä Schwarm vo Menschä, hol än Kafi, lüt is Büro a:
S wird spöter hüt. I bi do gschtrandet.
D Sara isch am ziitigläse, wo dä Pager piipst, schnuuft tüf i, lait s Gilet a: S isch wider passiert!
Und i sitz zmitzt imnä Schwarm vo Menschä, trink min Kafi, lueg d Zwanzgminute a, nimms gmüetlich, s lohnt sich nöd z pressiere.
De Sepp lauft de Schine no und luegd ganz gnau, will Spure wöred Wunde hinderlo. S mues si als wär nüt passiert!
Und i lauf zmitzt imnä Schwarm vo Menschä. Dä Ma im Lutschprächer sait, woni söll dürego. Wiiter jetz, di erscht Sitzig wartet…
S lütet bi dä Nadja dihai. Blau sind s agleit, bringed Unghüür vo Wort. Ischs wörkli passiert?
Text & Melodie: Margrit Egger
Arrangements: Cali Flores
Stimme & Schwyzerörgeli: Margrit Egger
Piano: Steffi Rutz
Gitarre: Sergio Valdeos
e-Bass: Omar Rojas
Perkussion: Cali Flores
