Cobratram (2013)

s’isch Firobig, i stiig is Tram i
quätsch mi dür d’Lüt
und heb mi fescht
min Stehnochber isst än Kebab
äs Rudäl Chinderwägä isch am milimeeterlä

jetzt stiigt än jungä Ma i
mit adächtig väschtrublätä Hoor
sini unuffällig quadratisch Täschä
bahnt sich än Wäg a mer vobii

wo’s Päärli denn au no gmärkt hät,
dass äs dä Igang frai geh sött
zückäd är und sini Kollegin
d’Usiwis: Billetkontrolä

s’isch aläs aglait uf schlächti Lunä
uf gnärvti Blick und betonts väschnufä
s’isch aläs gmacht uf: „Usgrächnet jetzt!“,
uf: „Das hät no gfält!“
und: „Muäs das au no si!“


jetzt schtigt ä Gruppä Frauä i
si schlängläd is Gängli und traatsched dött
näbadzue motzt ain i siis Natel
vom andre sim Chopfhörer g’hörsch än Technobeat

wo’d Türä denn fascht scho zue isch
truckt si än Typ mitäm Fuäss wider uf
är wörgt sich so lang i’d Lüt iä
bis sini zwai Rollköffer dinä sind

s’isch aläs aglait uf schlächti Lunä
uf gnärvti Blick und betonts väschnufä
s’isch aläs gmacht uf: „Usgrächnet jetzt!“,
uf: „Das hät no gfält!“
und: „Muäs das au no si!“


doch irgendwie got’s hüt a mer väbi!

Cobratram (CD Cobratram, 2019)

Lied & Arrangements: Cali Flores
Text: Margrit Egger

Stimme: Margrit Egger
Piano: Steffi Rutz
Gitarre: Sergio Valdeos
e-Bass: Omar Rojas
Klarinette: Karlhos Misajel